Publicador de contenidos
Atrás

Familia proiektua osatuta, Goiazko Ostatuan lanean

Cadizekoa da Pako Santana sukaldaria eta Arabakoa da Gema Berjano zerbitzaria, eta duela bost urtetik Bidania-Goiatzen bizi dira; herrian bertan hasi dira lanean, eta maiatzean ireki zuten Goiatz Ostatua.

09·09·2021


Tolosaldeko Atarian argitaratutakoa

 

Duela bost urtetik bizi dira Pako Santana eta Gema Berjano Bidania-Goiatzen, eta azkenean, aurten ausartu dira herriko jatetxea irekitzera. Maiatzaz geroztik, Goiazko Goiatz Ostatuko ateak zabalik dituzte, eta «oso gustura» ari dira lanean.

Pako Santana Cadizen (Andaluzia) jaioa da eta Gema Berjano, berriz, arabarra da. Maiatzaren erdi aldean ireki zuten eta orain arte egin duten bidearekin «pozik» agertu da bikotea. «Oso ondo» ari direla lanean dio Berjanok.

Herriarekin eta herritarrekin ere «gustura» daude, ez du zalantzarik: «Ostatua zabaldu genuenean herriak oso erantzun ona eman zigun, dena eman zuten. Egia esan oso pozik gaude, eta oso ondo hartu gaituzte hasieratik».

Bikoteak Kanaria Uharteetan lan egin zuen jatetxe batean, eta Euskal Herrira etortzearen arrazoietako bat, Berjano arabarra izatearekin batera, hiru seme-alaben hezkuntza izan zela kontatu dute. Era berean, herri txiki batean «landa eremua eta lasaitasuna» nahi zituzten, eta Bidania-Goiatzen aurkitu dute bizitokia. Eta, orain, baita lantokia ere.


Familia proiektua da Goiazko Ostatuan egin dutena. Kanaria Uhartean izandako esperientzia zuten, eta «talde ona egiten dugu», dio Berjanok. «Aurretik ere behin baino gehiagotan eskaini edo animatu izan gintuzten herriko ostaturen bat irekitzera» dio Berjanok. Aurten, senarrak aurrerapausoa ematea erabaki, eta biak sartu dira buru-belarri proiektuan.

Esan dute buruan zutela berriz ere batera lan egitearena. Haurrekin egon nahi zuten. «Orain artean bakoitzak alde banatan egiten genuen lana, eta benetan zaila zen familiako kontziliazioa». Herrian bertan Ostatua irekitzeko puntu garrantzitsuenetako bat hori izan dutela diote: «Biok hemen gaude; bat doa edo bestea dator, eta herrian bertan gaude».

ESKAINTZA EGOKITUZ

Azterketa bat egin dute jendeak edo herritarrek zer nahi eta eskatzen duten begiratuz, eta eskaera horri erantzuten ahalegintzen ari dira. «Egia da bizitza handia duen herria dela, eta adin tarte guztietako jendea mugitzen dela», esan du Berjanok. Eta gaineratu dute: «Bost urtez bertan bizitzen egotearekin dagoeneko, gutxi gorabehera, ezagutzen genituen zeintzuk ziren beharrak edota zer eskaini dakiokeen herriari».

«Gazteak daude. Bokatak, plater konbinatuak, patata minak edota hanburgesa bat jan dezaketenak dira. Helduagoei, agian, bada, karta jatea gehiago gustatzen zaie; arrain freskoa, entsaladak,... edota txerrikumea». Beraien berezitasun moduan dute txerrikumea, eta oso ondo ari dela funtzionatzen argitu dute: «Asko gustatzen ari da». Baina karta «irekia» dute, ahal den neurrian gustu guztietara iritsi ahal izateko. Astelehenetik ostiralera eguneko menua eskaintzen dute, eta «denetariko jendea da geratzen dena bazkaltzen», azaldu du Santanak. 09:00etan zabaltzen dituzte ostatuko ateak, eta jendearen arabera ixten dute.

Taberna eta jatetxeaz gain, pilotalekuan bertan dute terraza jarrita. Astelehen eta astearte arratsaldeetan ixten dute jatetxea: «Langile asko dabil une honetan inguru hauetan, eta menua eman ostean ixten dugu».

Txerrikumeaz gain, txipiroi entsalada epelak ere arrakasta izan duela diote. «Pako ona da sukaldean», esan du bikoteak. «Produktua zaintzea gustatzen zait. Produktua ona bada eta mimatzen baduzu...», dio sukaldariak, eta Berjanok gehitzen du: «Jatea gustatu egiten zaigu guri, eta bati ondo jatea gustatzen bazaio, sukaldean adierazi egiten du».

Hamar urtetik gorako esperientzia du sukaldean andaluziarrak. «Hotel, jatetxe, catering,... sukalde ezberdinetan aritu naiz lanean». Bost izarreko Melia Hoteleko sukaldean lanean aritua da Cadizen.

ANDALUZIA PLATEREAN

Nola ez, sukaldaria cadiztarra izanik, Goiazko Ostatuko jakietan, tarteka-tarteka, bada andaluziar kutsurik. «Noizean behin eguneko menuan plateren bat sartzen dut. Egia esan, hemen oso zaila da. Hemen ez dira espezieak asko gustatzen, eta Cadizen asko erabiltzen ditugu», esan du Santanak. «Zerbait ezberdina sartzen duzunean jendeak probatzen du, eta azkenean gustatu egiten zaie», dio zerbitzariak. Jendea probatzera ausartzen dela diote. «Esaterako, txipiroi entsalada beti ozpin saltsarekin edo ikusi izan dut hemen, eta ez dut sekula ikusi etxeko alioli batekin».

Goiazko Ostatura otorduren bat egitera joan nahi dutenek, aldez aurretik erreserba egitea komeni dela aurreratu dute. Eta txerrikumearen kasuan, bai ala bai egin beharko da erreserba. «Txerrikumeak bere denbora behar du egiten, ez da edozein arrain edo entrekot egitea bezala», zehaztu du sukaldariak. 943 25 43 44 da Goiazko Goiatz Ostatuko telefono zenbakia.

Bidania-Goiazko Udalarekin urtebeteko kontratua sinatu dute, eta bost urtez luzatzeko aukera izango dute. Ez diote herrian bertan lan egiteari kontra punturik ikusten, eta tabernaren bueltan, «giro ona» sortu dutelakoan daude.

Bidanian bizi direnez, onartu dute ez zutela Goiazko giroaren berri handirik, eta hasieran beldur pixka bat izan zutela nola funtzionatuko ote zuen, baina «pozik» daude. Bidanitik joaten dela jendea, eta kanpotarrak ere gerturatzen zaizkiela diote. Jatetxe bat zabaltzeak erraza dirudiela azaldu dute, baina benetan ez dela horrela diote. «Gustuko lana behar du izan», azpimarratu dute, eta ordu askoko lana bada ere, beraiek «bizitu» egiten dute.

 

Tolosaldeko Atarian argitaratutakoa